Ang Imong Kanindot (ni Luke Walter A. Ceballos, napatik sa Superbalita Pebrero 16, 2008)

Ang Imong Kanindot

(ni Luke Walter A. Ceballos, napatik sa Superbalita Pebrero 16, 2008)

Unsay naa sa imong hawak

nga sa paglatagaw sa akong huna-huna,

adto man gyud ko mosangit?

Unsay naa sa imong dughan og buko-buko

nga adto man gyud mogakos ang akong ispiritu?

Wala bay nakapahimangno nimo

nga naa kay pamaagi sa pagpakitag mga misteryo

sa imong kada lihok lakip na ang pag-urong?

Ug kini nagdala og peligro nga mga komplikasyon

sa kada inosenting saksi?

Kahibaw ka nga naa kay kupot kanako

ingon nga ang mga bukid gikuptan sa yuta.

Bisan imong gipatag ang akong mga paglaum ubos ngadto sa yuta,

makasibog gihapon kag mga bukid

bisan sa imong wala planohang kanindot.

Unsaon nako ang imong katahom

kung dili man gani tika maangkon?

Dawaton ko na lang ba ang panahom

nga ang kanindot para lang tan-awon?

Nganong ang mga mata di man makontento sa pagtan-aw lang?

Ug gusto man gyud sa kamot nga hikapon ug kuptan

ang kanindot nga dili makab-ot sa mata?